Әдеби жұмбақтар

Кейде жарты, кейде бүтін дөңгелек
Түн болғанда шомылады көлге кеп.
Жауап
Ай

Дөп-дөңгелек қос шыны,
Бұзылмайды достығы.
Өмір бойы екеуі
Қол ұстасып өтеді.
Жауап
Көзілдірік

Сырты жасыл, қап-қатты,
Іші қызыл, тәп-тәтті.
Жауап
Қарбыз

Ақ шатырлы бір қала
Суда жүзіп жүр дара.
Жауап
Кеме

Жазда жасанады,
Қыста томсарады.
Жауап
Ағаш

Жұмсаң – жұдырық,
Ашсаң – алақан.
Ыстықта, жауында
Серігің, балақан.
Жауап
Қолшатыр

Ыстық құйсаң, суымас,
Суық құйсаң, жылымас.
Бір құрал бар ыңғайлы,
Тұрмысыңа тым жайлы.
Жауап
Термос

Алдына барсаң, күлдіреді.
Кескін-кейпіңді бүлдіреді.
Жауап
Қисық айна

Үстіндегі көйлегі
Түрлі-түсті, не керек.
Қызықтырар көргенді,
Мұның аты...
Жауап
Көбелек

Көктемде көгереді,
Жазда ырысқа бөленеді.
Күзде пісіп, марқаяды,
Қыста бірден қартаяды.
Жауап
Жер

Өркеші бар, түйе емес,
Не ақ отау – үй емес.
Бір орнында тұрғаны,
Не болады бұл, кәне?
Жауап
Тау

Он көзі бар өзінде,
Он цифр бар көзінде.
Көзіне саусақ саласың,
Жырақтан хабар аласың.
Жауап
Телефон аппараты

Аяғы бар,
Белінде таяғы бар.
Жауап
«А» әрпі

Сөзі дана, үні жоқ,
Сөйлемейді, тілі жоқ.
Қолыңа алсаң – шешен,
Ақылы асқан көсем.
Жауап
Кітап

Жайқалады өріліп шашы жасыл,
Топыраққа көміліп басы жатыр.
Жауап
Пияз

Жер астына түседі,
Сап-сары боп піседі
Жауап
Сәбіз

Жанған отты кештегі
Үрлесем де өшпеді.
Жауап
Электр шам

Қар дейін десем,
Қап-қатты.
Тас дейін десем,
Тәп-тәтті.
Жауап
Қант

Қалпағы бар,
Жиегі жоқ.
Аузы бар,
Иегі жоқ.
Жауап
Шайнек

Қолтығыма кіреді,
Қызуымды біледі.
Жауап
Градусник

«
1
2
3
4
5
6
7
8
»