Әдеби жұмбақтар

Қиналмай тауларды, орманды,
Теңізді, дария, жондарды,
Ауылды, қаланы, халықты...,
Ойлап тап, көтерген алыпты.
Жауап
Жер

Тұмсығымен ояды,
Ағаш құртын жояды.
Жауап
Тоқылдақ

Сарғыш түсті, дөңгелек,
Ортасында дәні бар.
Көрсең егер оны жеп,
Балдай тәтті дәмі бар.
Жауап
Өрік

Биікте ұшып жүреді,
Елік, қоян бүреді.
Қия таста ұясы,
Бұл құсты кім біледі?
Жауап
Бүркіт

Тау, қыр, жазық, өзен, көл –
Қабырғада биік тұр.
Нансаң, кел, өзің көр –
Бір қағазға сыйып тұр.
Жауап
Карта

Емес ол кітап та, дәптер де,
Жүреді бірақ та портфельде.
Көрсетіп ондағы бағаңды,
Қуантып қоясың ағаңды.
Жауап
Күнделік

Ыстық құйып қой, мейлі,
Аязда да суытпас,
Суық құйып қой, мейлі,
Шілде айында жылытпас.
Жауап
Термос

Аты оның тәтті жеміс есіміндей,
Жемісі халқының мол несібіндей.
Білмесең бұл қаланы, онда сенің
Қалады қателігің кешірілмей.
Жауап
Алматы

Тауы жоқ маңайында, қырат бәрі,
Бұл қала тау есімді бірақ тағы.
Қорытқан шойын, болат домнасының
Табысы тау міндетін тұр атқарып.
Жауап
Теміртау

Алаудай туымыздың түсіменен
Есімін бұл қаланың мүсіндеген.
Күрішті, ырысты деп және айтамыз,
Ұл-қызы атына дақ түсірмеген.
Жауап
Қызылорда

Жетісу мен Арқаның арасында,
Сынаптай көлбеген көл жағасында.
Орналасқан қаланың есімі де
Көл аттас, ойлансаң, сен, табасың да?
Жауап
Балқаш

Есімінде екі сөз бірігіпті,
Балалар бірін ұқпай, бірін ұқты.
Ақпанда Арқа жақтан барған кісі
Бұл қала тұрған маңда жылыныпты.
Жауап
Шымкент

Аты да көк,
Заты да көк.
Жауап
Аспан

Жер-дүниені аралайды,
Жел, дауылды қаламайды.
Тұрақты бір тұрағы жоқ,
Тауға ғана паналайды.
Жауап
Бұлт

Өзі бел астында,
Көзі жер астында.
Жауап
Бұлақ

Бет-аузыңнан сүйеді,
Ерні суық тиеді.
Жауап
Аяз

Мінезі ашық данадай,
Пейілі кең анадай.
Оған барлық тіршілік
Еркелейді баладай.
Жауап
Жаз

Төрт аяқты чемодан,
Мүйізі бар қадаған
Естімейді, сөйлейді,
Ішіндегі көп адам.
Жауап
Теледидар

Атамның сапсыз орағы
Ілулі көкте жоғары.
Жауап
Ай

Өзімнен өзгенің бәрін көрем.
Жауап
Көз

«
1
2
3
4
5
6
7
8
»