Әдеби жұмбақтар

Нұры салқын,
Өзі жарық,
Шалқалап жүзген қайық.
Жауап
Ай

Тақтаны «досым» дейді,
Өзін сол досы «жейді».
Жауап
Бор

Қабат-қабат қаттама,
Қаттамадан аттама.
Ақылын оның ала бер,
Айтқан сөзін жатта да.
Жауап
Кітап

Бойын көрсең, теректей,
Ішін көрсең, кеуектей.
Желпілдеген үкісі
Найзадағы желектей.
Жауап
Қамыс

Білмейді кет дегенді, адасқанды,
Жаныңа жақсы көрер жанасқанды.
Үнсіз-ақ ғайып болар табан асты,
Тоқымдай бұлт шалса қара аспанды.
Жауап
Көлеңке

Қасыңнан өтер қолға ілінбестен,
Қашады басқан ізі білінбестен.
Жауап
Жел

Таудан төмен қар жауар,
Қозғай берсең, көп жауар.
Жауап
Ұн, елек

Қорқа ма әлде, жарықтан ол қашады,
Әдеті бар паналайтын тасаны.
Жауап
Көлеңке

Тұратұғын әр үйде,
Жайлы орын сәбиге,
Шаңғы табан үйшік ол,
Тербететін, әрине.
Жауап
Бесік

Жүрген сайын жүйрігім
Қысқартады құйрығын.
Жауап
Ине, жіп

Екі аяқты, бір ізді
Үстіне мені мінгізді,
Мінгізгенмен, ол менің
Аяғымды жүргізді.
Жауап
Велосипед

Табанында жолы бар,
Төбесінде қолы бар.
Жауап
Трамвай

Қауаққа да ұқсаған,
Алмұртқа да ұқсаған,
Аузы бар, тілі бар,
Білер көріп, ұстаған.
Жауап
Қоңырау

Қадалды бір ине
Нүктедей түймеге.
Жауап
Леп белгісі

Сырғалы құлақ бір,
Үн-түнсіз сұрап тұр.
Жауап
Сұрақ белгі

Ойдың аяқталуын күтпейді,
Оны қойсаң, сөйлем бітпейді.
Жауап
Үтір

Тақия, мұрын, бір құлағы бар,
Самаурын қасында тұрағы бар.
Жауап
Шайнек

Бірінің ізін бірі басады,
Біріне жеткізбей, бірі қашады.
Жауап
Дөңгелектер

Қауын, қарбыз дей алмайсың,
Піскенмен, жей алмайсың.
Жарғаныңмен, қап-қатты,
Ал асқанда, тәп-тәтті.
Жауап
Асқабақ

Сары қозы, көк қозы,
Қарындары тоқ қозы.
Күздігүні көп қозы,
Қыстыгүні жоқ қозы.
Жауап
Қауын-қарбыз

«
1
2
3
4
5
6
7
8
»